Qazax-Tovuz Regional Təhsil İdarəsinin tabeliyində fəaliyyət göstərən təhsil müəssisələrində Xocalı soyqırımının 33-cü ildönümü ilə əlaqədar tədbirlər keçirilib.

Tədbirlər Dövlət Himninin səsləndirilməsi və Vətən şəhidlərinin, Xocalı qurbanlarının əziz xatirəsinin bir dəqiqəlik sükutla yad edilməsi ilə başlayıb.

Tədbirlərdə böyüməkdə olan nəslə XX əsrin ən dəhşətli hadisələrindən olan Xocalı soyqırımı haqqında məlumat verilib, onun dünyaya tanıdılması işinin dövlətimizin daim diqqət mərkəzində olduğu bildirilib.

Vətən Müharibəsi və lokal antiterror əməliyyatları nəticəsində Azərbaycanın ərazi bütövlüyünün və ölkəmizin suverenliyinin tam bərpa edilməsi, Xocalı sakinlərinin artıq öz evlərinə geri dönməsi, Qarabağda gedən yenidənqurma işlərinin sürətlə davam etdirilməsi şagirdlərin nəzərinə çatdırılıb.

Qeyd edək ki, təhsil müəssisələrində Xocalı soyqırımına həsr olunan xüsusi dərslər keçirilib, tədbirlər və şagirdlərin əl işlərindən ibarət rəsm sərgiləri təşkil edilib.