Avqustun 27-də Qazax-Tovuz Regional Təhsil İdarəsinin tabeliyində fəaliyyət göstərən ümumi təhsil müəssisələrini qızıl və gümüş nişanla bitirən məzunlarla görüş keçirilib.

Görüşdə Qazax-Tovuz Regional Təhsil İdarəsinin müdiri, idarə əməkdaşları, məzunlar, məktəb direktorları və valideynlər iştirak ediblər.

Qazax-Tovuz Regional Təhsil İdarəsinin müdiri Arslan Hacıyev çıxış edərək qəbul imtahanlarında yüksək nəticələr göstərən abituriyentləri, onların valideynlərini və müəllimləri təbrik edib. Həmçinin ölkəmizdə təhsilə göstərilən diqqət və qayğıdan danışıb, regionda təhsilin inkişafı üçün görülən işlər haqqında məlumat verib.

Sonra məzunlar çıxış edərək seçdikləri ixtisasdan asılı olmayaraq hər zaman çalışaraq ölkəmizə layiqli vətəndaş kimi yetişəcəklərinə söz veriblər.

Daha sonra məzunlara qızıl və gümüş nişanlar, attestatlar və hədiyyələr təqdim edilib.