Yanvarın 20-də Tovuz rayonu üzrə təhsil sektorunun və Tovuz rayon Uşaq-Gənclər İdman-Şahmat Məktəbinin birgə təşkilatçılığı ilə 20 yanvar şəhidlərinin xatirəsinə həsr olunmuş şahmat üzrə tempo turnir keçirilib.

Turnirdə region üzrə şahmat məktəblərinin müəllim və şagirdləri, eləcə də həvəskar şahmatçılar iştirak edirdilər.

İlk öncə şəhidlərin xatirəsi bir dəqiqəlik sükutla yad edildi.

Daha sonra Qazax-Tovuz Regional Təhsil İdarəsinin müdiri Arslan Hacıyev çıxış edərək 20 yanvar gününün milli qürur günü olduğunu qeyd etdi və belə turnirlərin region məktəbliləri üçün əhəmiyyətindən bəhs edərək, bütün iştirakçılara uğurlar arzuladı.

Maraqlı və gərgin mübarizə şəraitində keçən yarışın sonunda qaliblər "Diplom" və hədiyyələrlə təltif olundular.

Qeyd edək ki, turnirin keçirilməsində məqsəd regionda şahmatın kütləviliyini təmin etməklə yanaşı bu idman növü üzrə azyaşlı şahmatçıların təcrübələrini artırmaqdır.