Dekabrın 7-də Şəmkir rayon Nizami Gəncəvi adına tam orta məktəbinin idman zalında “Coca-cola” şirkətinin dəstəyi, AFFA, Şəmkir rayon Təhsil Şöbəsi və Şəmkir rayon Gənclər və İdman İdarəsinin təşkilatçılığı ilə mini futbol üzrə rayon birinciliyinin final yarışı keçirilib.

Azərbaycanda uşaq futbolu üzrə ən irimiqyaslı turnir olan “Coca-Cola” Məktəbli Kuboku Təhsil Nazirliyi, Azərbaycan Futbol Federasiyaları Assosiasiyası və “Coca-Cola”-nın 2011-ci ildən etibarən həyata keçirdiyi idman layihəsidir. Layihə ölkədə futbolun kütləviliyinin təmin olunması, uşaq futbolunun tərəqqisi və ümumillikdə məktəblilərin fəal və sağlam həyat tərzinə cəlb edilməsi məqsədi daşıyır. Ötən beş il ərzində adıçəkilən birincilik 1 milyondan artıq məktəblini cəlb edib və turnirin qalibləri müxtəlif beynəlxalq yarışlarda iştirak hüququ qazanıb. Bugün yarışda Şəmkir rayonu üzrə 10 məktəbin komadaları mübarizə aparıb.

“Coca-Cola” Məktəbli Kuboku Şəmkir rayonu üzrə qalibləri Nizami Gəncəvi və Cahangir Rüstəmov adına tam orta məktəblərinin komandaları olub. Onlar Bakıda keçiriləcək yarışda rayonumuzu təmsil edəcəklər.