Noyabrın 20-də Şəmkir rayonunun ümumi təhsil müəssisələrində dərs deyən bir qrup gənc müəllim Cəbrayıl rayonunun yenidən qurulan Cocuq Mərcanlı kəndinə səfər ediblər.

Əvvəlcə gənc müəllimlərdən və eləcə də rayonun fəal gənclərindən ibarət “Böyük yol” ictimai təşkilatının üzvləri “Aprel şəhidlərinə xatirə” abidəsini ziyarət edib, Vətən uğrunda şəhid  olanların xatirəsini hörmətlə anıblar.

Daha sonra gənc müəllimlər kənddə inşa olunan şəhid Novruz Aslanov adına Cocuq Mərcanlı kənd tam orta məktəbinin müəllimləriylə görüşüblər.

Gənclər məktəbdə yaradılan şəraitlə tanış olub, sinif otaqlarını gəzib və müəllimlərlə söhbət ediblər. Cocuq Mərcanlı kəndində məktəbin fəaliyyətə başlamasının, uşaqların rahat şəkildə təlim və tədris prosesində iştirakının burada dinc və firavan həyatın təmin edilməsinə bariz nümunə olduğu bildirilib.

Qeyd edək ki, Cocuq Mərcanlı kənd tam orta məktəbi ölkə Prezidenti cənab İlham Əliyevin “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” sərəncamına əsasən tikilib.

Məktəbdə 60-a yaxın şagirdin təlim-tərbiyəsi ilə 20 nəfər müəllim çalışır. Sinif otaqları, informatika, gənclərin çağırışaqədərki hazırlıq kabinetləri, müəllimlər otağından ibarət məktəb binası lazımi avadanlıqlar, istilik sistemi və internetlə təchiz edilib.

Səfər çərçivəsində gənc müəllimlər Cocuq Mərcanlı kəndində yenidən qurulan şəraitlə yaxından tanış olublar.