Oktyabrın 6-da Şəmkir Heydər Əliyev Mərkəzində Rayon Təhsil Şöbəsinin və Şəmkir Heydər Əliyev Mərkəzinin təşkilatçılığı ilə 5 oktyabr - Beynəlxalq Müəllimlər gününə həsr edilmiş tədbir keçirilib.

Tədbirdə rayon təhsil şöbəsinin müdiri Məcid Şıxlinski, millət vəkili, Şəmkir Heydər Əliyev Mərkəzinin direktoru Sona Əliyeva, YAP rayon təşkilatının sədri Fəxrəddin Vəliyev, təhsil şöbəsinin əməkdaşları, rayon ümumtəhsil məktəblərinin müəllimləri iştirak ediblər.

Çıxış edənlər ilk olaraq, müəllimlər günün tarixindən danışıb, bu günün müstəqil Azərbaycanın tarixində ilk dəfə, məhz, ulu öndər Heydər Əliyevin prezidentliyi dövründə qeyd edilməyə başlandığını qeyd edib, ümumilli liderin müəllim peşəsinə böyük hörmət bəslədiyini iştirakçıların diqqətinə çatdırıblar.

Tədbirdə təhsil şöbəsi tərəfindən keçirilən “Mənim müəllimim” inşa yazı müsabiqəsinin qalibləri mükafatlandırılıb. Ötən tədris ilində məktəb fəaliyyətində əldə etdiyi uğurlara görə bəzi məktəb rəhbərləri fəxri fərmana layiq görülüb.

Çıxışların ardından Əhməd Cavad adına şəhər tam orta məktəbi, Şəmkir Oksford məktəbi, Şiştəpə kənd tam orta məktəbinin şagirdləri və Şəmkir rayon 7 illik uşaq musiqi məktəbinin müəllimlərinin ifasında müəllimlər gününə həsr edilmiş ədəbi-bədii kompozisiya iştirakçılara nümayiş etdirilib.