Şəmkir rayon Düyərli kənd 1 nömrəli tam orta məktəbinin coğrafiya müəllimi İradə Nağıyeva “Pedaqogika üzrə fəlsəfə doktoru” elmi dərəcəsi alıb.

İradə Nağıyeva 1983-cü ildə Azərbaycan Dövlət Pedaqoji Universitetinin Coğrafiya fakültəsini bitirib. Elə həmin ildən etibarən Şəmkir rayon 1 saylı Düyərli kənd tam orta məktəbində coğrafiya müəllimi işləyir. İradə Nağıyeva işlədiyi dövr ərzində yüksək peşəkarlığı, məsuliyyəti və sənətinə olan bağlılığı ilə şagird və müəllim kollektivinin sevgisini qazanıb. Onun elmi məqalələri Azərbaycanın elmi-pedaqoji mətbuatında, həmçinin Rusiya və Qazaxıstanın elmi jurnallarında dərc olunub. İradə Nağıyeva 1 kitab və 11 elmi məqalənin müəllifidir. 

Gördüyü işlərin nəticəsi olaraq İradə Nağıyeva Təhsil Nazirliyi tərəfindən 2001-ci ildə Diplom, 2006-cı ildə isə “Azərbaycan Respublikası qabaqcıl təhsil işçisi” döş nişanı ilə təltif olunmuşdur. 

Bununla yanaşı İradə Nağıyeva “Coğrafiyanın tədrisində şagirdlərin müstəqil işinin təşkili” mövzusunda dissertasiyasını müdafiə edərək 7 aprel 2017-ci il tarixdə “Pedaqogika üzrə fəlsəfə doktoru” elmi dərəcəsini alıb.