Şəmkir rayon Təhsil Şöbəsinin tabeliyində fəaliyyət göstərən ümumi təhsil məktəblərində çalışan məktəb direktorlarının iştirakı ilə təhsilyanı şura iclası keçirilib. İclası giriş sözü ilə Şəmkir RTŞ-nin müdiri Məcid Şıxlinski açıq elan edərək, şura iclasının gündəliyində müzakirə olunacaq məslələr haqqında qısa məlumat verib.

İclasda çıxış edən Şəmkir RTŞ-nin müdir müavini Cəlal Hüseynov “Azərbaycan Respublikasının Dövlət gerbinin təsviri olan möhürlərin və sənəd blankalarının hazırlanması, istifadə olunması, saxlanması və məhv edilməsi Qaydası” haqqında məktəb rəhbrlərinə ümumi məlumat verib. Bununla yanaşı, 2017-ci ilin Azərbaycan Respublikasında “İslam Həmrəylik İli” elan edilməsi ilə bağlı tədbirlər planının təsdiq edilməsi üçün direktorlara göstəriş verilib.

Təhsil müəssisələrində təhlükəsizliyin təmin edilməsi barədə çıxış edən Şəmkir RTŞ-nin idman üzrə metodisti Südabə Vəliyeva bunun üçün görülməsi vacib olan işlərin ardıcıllığı ilə müəssisə rəhbərlərini tanış edib.

Azərbaycan Respublikası Təhsil Nazirliyinin 27 yanvar 2017-ci il 119№-li əmrinə uyğun olaraq Ümumilli Lider Heydər Əliyevin anadan olmasının 94-cü il dönümü ilə əlaqədar ümumtəhsil məktəb şagirdləri arasında “Ən yaxşı təqdimat” müsabiqəsinin keçirilməsi barədə Şəmkir RTŞ-nin metodkabinet müdiri Firdovsi Aslanov məlumat verib.

Çıxışların ardınca Şəmkir RTŞ-nin məsləhətçisi Elşən Qasımov, “Azərbaycan Respubikası Təhsil Nazirliyi sisteminə daxil olan ümumi təhsil müəssisələrində direktor vəzifəsinə işə qəbul Qaydaları” barədə təsdiq olunmuş yeni qaydalar haqqında məlumat verib.

İclasın gündəliyində duran məsələlərlə bağlı geniş müzakirələr aparılıb, sonda qərar layihəsi oxunulub.