Təhsil Nazirliyi, “British Council” və BP Azərbaycan şirkəti ilə birgə əməkdaşlıq çərçivəsində  “İngilis dili müəllimlərinin və icma üzvlərinin ingilis dili bilik və bacarıqlarının artırılması layihəsi” çərcivəsində təlimlərdə iştirak etmiş müəllimlər bugün icmalarda öz fəaliyyətlərini davam etdirirlər.

Layihədə qazandığı bilikləri icma üzvlərinə öyrədən Zəyəm qəsəbə Səlahəddin Məmmədov adına tam orta məktəbin ingilis dili müəllimi Vüsalə Mehtiyeva dərslərin maraqlı keçdiyini bildirir:

“Layihə Azərbaycanın neft-qaz boru kəməri keçən ərazilərindəki icma üzvlərinə ingilis dilini öyrətmək üçün həyata keçirilir. Bizim qəsəbə də qeyd olunan əraziyə daxildir. Hazırda 16 nəfərdən ibarət 12-16 yaşlarındakı məktəblilərə dərs keçirəm. Şagrdlərim dərsə həvəslə yanaşırlar. Dərslərimiz british council təlimçiləri tərəfindən mütəmadi olaraq internet bağlantısı vasitəsilə izlənilir və dərslərimizə kömək məqsədi ilə bizə bəzi  göstərişlər verilir. Tədrisin həyata keçirilməsi üçün lazım olan vəsaitlər BP Azərbaycan şirkəti tərəfindən tam təmanasız təmin edilir”.

Qeyd edək ki, müəllimlər üçün nəzərdə tutulmuş layihənin növbəti mərhələsinin apreldə keçirilməsi planlaşdırılır. Bu müddət ərzində ingilis dili üzrə dərs tədris edən müəllimlərin zəif və güclü tərəfləri müəyyən edilərək onlara göstərişlər verilir və onlarla daimi əlaqə saxlanılaraq lazımı materiallar onlara göndərilir.